Stichting Kostverloren, de aanjager van de Groninger cultuur en streektaal

[ Nederlands ]

Kostverloren noader verkloard
Kostverloren is zo Grunnegs as wat. Wel deur ons pervinzie struunt kin der vaaier keer deurhin raaizen: in stad, tussen Faarmsom en Delfsiel, tussen Drijbörg en Finnerwolde en haalfweg Zuudbrouk en Sapmeer. Je kinnen mit Kostverloren hail wat kanten op. Vrouger was t n veurpost in oorlogstied en op t heden n veurpost van de Grunneger cultuur. De streekcultuur mout nait stilstoan blieven. Dat zol ja de dood in de pot wezen. Doarom is der aal joar wel weer wat nijs op t pergram. Grunneger cultuur mit Kostverloren is wat aans as op n ollerwetse Grunneger oavend mit kroantjespotten miemern over vrouger. Doar is niks verkeerds aan, mor aander tieden, aander dingen. Grunneger cultuur is ja zo nijmoods as wat.

Oprichting
Kostverloren wer in 1988 opricht deur Harm van der Veen en Klaas Staal. Mit aigentiedse pergrams wollen zai Grunneger cultuur en streektoal aanpeerdjen. Om zuk hin verzoamelden zai n bestuur. Soamen begonnen ze n pergram te moaken veur Meertmoand Dialectmoand. Meertmoand Dialectmoand was n initiatief van t SONT (federatie Streektaalorganisaties Nedersaksisch Taalgebied). Kostverloren gaf hier veur de pervinzie Grunnen handen en vouten aan.
De stichten wil zich blieven begeven op nije wegen in de Grunneger streekcultuur. Sinds de oprichten is Kostverloren oetgruid tot n trendsettende ploug in t moaken van pergrams in Grunneger toal en over Grunneger cultuur.
Veur veul lu is Kostverloren Meertmoand Dialectmoand, mor sinds 2000 organiseert Kostverloren ook evenementen boeten Meertmoand Dialectmoand om.

Stichting Kostverloren